سُرمئی فارسی صفت ہے جسے "سُرمے کا رنگ" کہا جاتا ہے یعنی وہ رنگ جو سُرمے جیسا ہو۔آسمان پر نظر آنے والے بادلوں کا رنگ گہرا سیاہ‘ سفید اور تیسرا رنگ ان دونوں کے درمیان ہوتا ہے جسے سُرمئی کہا جا سکتا ہے ۔یعنی سُرمئی وہ رنگ ہے جو سیاہ اور سفید کا درمیانی رنگ ہے بلکہ اس میں کسی حد تک نِیلے رنگ کی آمیزش بھی پائی جاتی ہے۔ سُرمئی رنگ دو طرح کے ہوتے ہیں۔ ایک وہ جو پیلے‘ نارنجی اور سبز رنگ سے مل کر بنتا ہے جسے گرم سُرمئی(Warm Grey)اور دوسرا سبز‘ نیلے اوربنفشئی( بنفشی) رنگوں سے مل کر بنتا ہے جسے سرد سُرمئی (Cool Grey)کہتے ہیں۔ مشہور ہے کہ ان دونوں ٹھنڈے اور گرم سُرمئی رنگوں میں ایک اخلاقی پہلو بھی ہے یعنی ہلکا سُرمئی رنگ اپنے اندر خوش اخلاقی یا سنجیدگی کا مفہوم رکھتا ہے جبکہ گہرا سُرمئی رنگ اس کے بر عکس غیر سنجیدگی کی علامت سمجھا جاتا ہے۔اسی لیے جب سیاہ بال سفید ہونا شروع ہو جاتے ہیں تو کہا جاتا ہے کہ اب اس شخص میں سنجیدگی آرہی ہے۔ مشہور اخبار "نیو یارک ٹائمز" کو"دی گرے لیڈی"(The Grey Lady) کا نام بھی دیا گیا ہے۔ ١٩٤٥ء کی دوسری جنگِ عظیم کے دوران امریکی اور جرمن فوج کی وردی کا رنگ بھی سُرمئی تھا۔ بیشتر تعلیمی اداروں کے طلبہ و طالبات کی یونیفارم سُرمئی رنگ کی ہوتی ہے اس کی وجہ یہ ہے کہ سُرمئی رنگ گرد و غبار کی وجہ سے جلدی بدنما اور عیب دار نظر نہیں آتا اور اس رنگ پر میل کُچیل زیادہ نمایاں نہیں ہو پاتا۔ فارسی زبان میں " سرمئی چشم " یا " سُرمہ چشم" عزیز یا پیارا کو کہا جاتا ہے۔