بی بام سدا بہار جڑی بوٹی ہے جس کی جائے پیدائش شمال مشرقی امریکہ ہے۔ آنٹیریو (Ontario) اور برطانوی کولمبیا سے جارجیا اور میکسیکو تک یہ پھول خشک اور گنجان جھاڑی میں پیدا ہوتا ہے۔ اس کے پھول چمکدار، سُرخ، گلابی یا بکائنی ہوتے ہیں جن کی جسامت بڑی ہوتی ہے۔ یہ پھول 20 سے 50 کی تعداد میں گھنے پتّوں کی ٹوکری نُما جگہ پر نُمایاں ہوتے ہیں۔ اس کی کونپلیں زردی مائل سبز رنگ کی ہوتی ہیں۔ بی بام کی شاخیں چوکور‘ نالی نما اور سخت ہوتی ہیں اور اس کی اونچائی تقریباً تین فِٹ ہوتی ہے۔ اس کے پتّے جوڑے کی صورت میں ہوتے ہیں جن کی سمت مخالف ہوتی ہے اور ان کی دونوں سطحیں کھردری ہوتی ہیں۔ اس کی شکل دندانے دار اور نیزے یا برچھی کی مانند ہوتی ہے۔ بے بام کی شاخیں اور پتّے گھنے اور چمکدار روئیں سے ڈھکے ہوتے ہیں۔