کریلا جو ایک کسیلی سبزی ہے ،اس کے ساتھ قیمہ ملا کر یہ خاص ڈش تیار کی جاتی ہے۔ عموماً ثابت کریلوں کو چھیل کر اور درمیان سے چِیرا لگا کر انھیں نمکین پانی سے دھویا جاتا ہے ۔اس عمل سے کریلوں کی کڑواہٹ کسی حد تک کم ہوجاتی ہے پھر اِن کریلوں میں قیمہ بھر کر اور دھاگے سے کریلوں کے کُھلے حصّے بند کرکے یہ ڈش تیار کی جاتی ہے۔ بعض اوقات کریلوں کو چھوٹے چھوٹے ٹکڑوں میں کاٹ کر قیمہ کے ساتھ ملا کر سالن تیار کیا جاتا ہے۔ دونوں صورتوں میں نہایت لذیذ سالن تیّار ہوتا ہے۔ کریلا‘ گوشت کے دف کو مارتا ہے اور خون کو صاف کرنے میں بھی مددگار ثابت ہوتا ہے۔ ہندُ ستان و پاکستان کے کھانوں میں یہ نہایت مشہور کھانا ہے۔