لُغوی اعتبار سے ہندی صفت ، بمعنی لیس دار یا چپکنے والا۔علم الابدان کے لحاظ سے پیلے رنگ کا ایک بڑا غدود جو معدے کے پیچھے ہوتا ہے اور دو قسم کے عرق تیار کرتا ہے۔ایک عرق غذا کے ہضم میں مدد دیتا ہے اور دوسرا خون یا جسم میں شکر جذب ہونے میں مدد دیتا ہے۔ غدۂ حلوہ یا لبلبہ (انگریزی: pancreas) فقاریہ حیوانات (vertebrates) کے نظامِ انہضام (digestive system) اور صمّاوی نظام (endocrine system) میں ایک غدہ عضو (gland organ) ہے ۔ یہ خارجی غدہ (exocrine gland) اور صمّاوی غدہ (endocrine gland) دونوں اقسام کے غدود کا کام سر انجام دیتا ہے اور "حلوی رس" (pancreatic juice) خارج کرتا ہے جس میں انہضامی خامرے (digestive enzymes) ہوتے ہیں اور متعدد اہم ہارمون(انگیزات) (hormones) جیسے جزیرین (insulin)، زعامۂ شکر (glucagon) وغیرہ خارج کرتا ہے۔ یہ اِنہضامی خامرے بھی بناتا ہے جو چھوٹی آنت میں چلے جاتے ہیں ۔ یہ خامرے کیموس (chyme) میں نشاستوں (carbohydrates)، لحمیات (proteins) اور شحم یا چربی (fats) کو مزید توڑنے میں مدد دیتے ہیں۔ یہ ایک قسم کا مرکب غُدّہ ہے جو خود نالی دار ہے لیکن اس کے اندر بغیر نالی کے غدود بھی موجود ہوتے ہیں۔ یہ لمبوترا‘ چپٹا اور زردی مائل ہوتا ہے جس کی لمبائی تقریباً تین یا چار انچ ہوتی ہے۔ یہ اثنا عشری سے لے کر طحال Spleen تک معدے کے نیچے پھیلا ہوتا ہے۔ سر‘ گردن‘ دھڑ اور دُم کی طرح اس کے بھی مختلف حصّے ہوتے ہیں۔ اس کا سر اثناءِ عشری کے درمیان پھنسا ہوتا ہے ، جسم مِعدے کے نیچے اور دُم طِحال کو چُھوتی رہتی ہے۔ یہ کئی شاخوں میں منقسم ہوتا ہے۔ اس کی نالیاں ایک دوسرے سے مل کر مَجَرّی لَبلَبہ Pancreat Ductic بناتی ہیں جو مجری الکبر Hepatic Duct کے ساتھ مل کر اثناءِ عشری میں کُھلتی ہے۔ اس کے رسیلات، شَحَمی‘ لحمی اور نشاستئی مادّوں کو ہضم کرتے ہیں۔