دمہ ایک ایسا مرض ہے کہ جس میں سانس لینے میں تکلیف ہوتی ہے۔سانس لینے کے دوران سینے سے سِیٹیاں بجنے کی آوازیں آتی ہیں، سانس لینے میں مریض ہانپنے لگتا ہے، پھیپھڑوں میں ہوا کی نالیاں سُکڑنے سے سانس میں رکاوٹ پیدا ہوتی ہے۔ دمہ عام طور پرموروثی ہوتا ہے لیکن اس کے اور بھی اسباب ہوتے ہیں۔ غذا میں کسی جزو کی ناموافقت ‘ گردوغبار اور ہوا میں کیمیائی و دیگر نباتاتی اجزا کا موجود ہونا بھی بعض حساس طبیعتوں میں دمہ پیدا کرتا ہے۔دمہ ایک طرح کی حساسیت(الرجی) ہی ہے جس میں بلّی کے بالوں(روئیں)،قالین کے جھاڑنے یا کسی اُونی کپڑے یا فنائل کی گولیوں سے بھی سانس بے قابو ہو جاتی ہے اور دَم گُھٹنے لگتا ہے۔ کہتے ہیں "دمہ ، دَم کے ساتھ ہے!" لیکن مکمل علاج معالجہ اور احتیاط سے اِس مرض پر قابو پایا جاسکتا ہے۔