اُردو زبان میں "کاہی" ہلکا سبز رنگ مائل بہ سیاہی کہلاتا ہے۔ اس رنگ کو " کائی" یا "سبز کاہی" رنگ بھی کہا جاتا ہے۔ بنیادی طور پر اس رنگ کا تعلق "سبز" رنگ کے خاندان یا گروہ سے ہے کیونکہ سبز (Green) رنگ 520-570 نینو میٹر طول موج کے درمیان پایا جاتا ہے۔ یہ 3 بنیادی رنگوں سرخ، سبز اور نیلے میں سے ایک ہے لہٰذا اگر سبز رنگ کا تعدد کم ہوجائے تو گہرا سبزی مائل رنگ نمودار ہوتا ہے جو دراصل " کاہی" رنگ ہے۔ مرزاغالب نے بہادر شاہ ظفر کی صحت یابی کے موقع پر ایک قصیدہ کہا تھا، جس کا ایک شعر ہے: "سبزے کو جب کہیں جگہ نہ ملی ۔ بن گیا رُوئے آب پر وہ کائی" موسمِ برسات میں اکثر چُونے کی دیواروں اور ٹھیرے ہوئے پانی پر گہرے سبز رنگ کی ایک نبات جم جاتی ہے ، یہی کائی یا "اَلجی یا اَلجائی" کہلاتی ہے۔ بسا اوقات " کائی" کو نبات (پودا) اور "کاہی" کو رنگ تسلیم کیا جاتا ہے۔یعنی کائی کا رنگ کاہی کہلائے گا۔