کاجُو کا بِیج گُردے کی شکل کا ہوتا ہے جو پھل کی تہہ سے جُڑا ہوا ہوتا ہے۔ کاجو کا وطن شمال مشرقی برازیل کے ساحلی علاقے ہیں۔ یہ پھل ہمیشہ بغیر چِھلکے کے فروخت ہوتا ہے کیوں کہ اس کے اندرونی حصّہ میں ایک قسم کا کھارا گوند پایا جاتا ہے جو کاجو بام کہلاتا ہے۔ بیج کو استعمال کرنے سے پہلے یہ گوند احتیاط سے الگ کیا جانا چاہیئے۔ یہ تیزابی گوند اصل میں جراثیم کُش ادویہ اور وارنش بنانے والی صنعت میں استعمال کی جاتی ہے۔