یہ ہرے رنگ کا مخروطی پھل ہوتا ہے جو ایک انچ سے تین انچ تک لمبا ہوتا ہے۔ اس کا پودا چار سے ساڑھے چار فیٹ تک بُلند ہوتا ہے۔ مرچ عموماً سبز رنگ کی ہوتی ہے لیکن سُرخ، سیاہ اور سفید انواع کی بھی پائی جاتی ہے۔ اس کا ذائقہ بہت تیز ہوتا ہے اور ہانڈی میں بطور مسالہ ڈالی جاتی ہے۔ بڑی قسم کی مرچوں میں مسالہ بھر کر انہیں تَلا بھی جاتا ہے جو دستر خوان کی رونق کو دوبالا کرتا ہے۔ ہری مرچ ،پھل ہے لیکن سبزی کے طور پر استعمال کی جاتی ہے۔ یورپ اور ایشیائے کو چک میں ایک صدی پہلے تک اسے زہر (Poison) سمجھا جاتا تھا۔ہری یا سبز مرچ کی سب سے "تیز" قسم "تَتیَّا مرچ" کہاتی ہے جسے کھانا ہر کسی کے بس کی بات نہیں ۔ہِندُستان ہری مرچوں کی پیداوار کے لیے مشہور ہے اور دہلی ان کے استعمال کے لحاظ سے سرِفہرست علاقہ تسلیم کیا جاتا ہے۔جہاں سالنوں میں شامل کرنے کے علاوہ مرچوں کا اچار،مرچوں کی چٹنیاں،مرچوں کی میٹھی چٹنی،مُربے،سالن علاوہ ازیں دال، سبزی کے ساتھ کچّی مرچیں کھانے کارواج بھی ہے۔ لفظ "مرچ" اُردو صفت کے لحاظ سے نہایت تیز ،آفت ،قیامت لڑکی یا شے کے لیے مستعمل ہے۔