زعفران کا پودا اور پھول دونوں ہی زعفران کہلاتے ہیں البتہ اس کا پھول انتہائی خوشبودار اور زرد رنگ کا ہوتا ہے۔ اس کا فیملی نام (Iridaceae)ہے۔ اس کے تین Stagma ہوتے ہیں۔ اس کا ذائقہ کڑوا ہوتا ہے۔ مگر اس میں بے پناہ فوائد ہیں۔ زمانۂ قدیم سے زعفران نہ صرف کھانوں میں ذائقے اور خوشبو کے لئے استعمال ہوتا چلا آرہا ہے بلکہ ٹیکسٹائل کے شعبے میں کپڑوں کی رنگ سازی میں بھی اہم کردار ادا کر رہا ہے۔ تاریخی حوالے سے زعفران کا استعمال 2000 سال قبلِ مسیح سے جاری ہے۔ سکندر اعظم نے بھی ایرانی زعفران کو مختلف حوالوں سے یونانی سپاہ میں متعارف کرایا۔ برِصغیر میں وادئ کشمیر کو زعفران کی وادی بھی کہا جاتا ہے۔ کشمیر میں زعفران کی کاشت دنیا میں سب سے زیادہ کی جاتی ہے اور اس کی فروخت کے ذریعے کثیر زرِمبادلہ کمایا جاتا ہے کیونکہ زعفران انتہائی قیمتی اور کم یاب پھول ہیں۔ یہ دواؤں میں بھی استعمال کی جاتی ہے ۔اس کے علاوہ وِچ (witch) ڈاکٹرز اور روحانی عملیات کرنے والے افراد بھی تعویذ گنڈوں کے لکھنے میں زعفران کے سفوف کو پانی میں حل کرکے استعمال کرتے ہیں۔