جس سے کھوئی تھی نیند میر نے کل
ابتدا پھر وہی کہانی کی
(میر تقی میر)
|
اب شورِ حشر مجھ کو جگائے تو غم نہیں
میں سو لیا لحد میں میری نیند بھر گئی
(بیدم وارثی)
|
امجد ہماری آنکھ میں لَوٹی نہ پھر کبھی
اُس بے وفا کے ساتھ گئی بے وفا‘ وہ نیند
(امجد اسلام امجد)
|
نیند جب خوابوں سے پیاری ہو‘ تو ایسے عہد میں
خواب دیکھے کون اور خوابوں کو دے تعبیر کون
(پروین شاکر)
|
میں ترے صدقے گئی اے مری پیاری مت چیخ
مت جگا نیند بھرے لوگوں کو واری مت چیخ
(انشا)
|
نوجوانی کھو کے یوں پیری میں غفلت بڑھ گئی
صبح کو آتی ہے جیسے نیند شب بیدار کو
(مصحفی)
|
