Description
تفصیل
مغلیہ کھانوں کی ایک معروف ڈش جو نرگسی کوفتے کہلاتی ہے۔ یہ کوفتے بھی عام کوفتوں کی طرح تیار کیے جاتے ہیں فرق صرف اتنا ہے کہ نرگسی کوفتے جسامت میں بڑے ہوتے ہیں اور ان کوفتوں کے درمیان اُبلا ہوا انڈا رکھا جاتا ہے۔جب یہ کوفتے تیار ہو کر مہمانوں کے سامنے پیش کیے جاتے ہیں تو ان کو درمیان سے عموداً کاٹ دیا جاتا ہے اور دونوں کٹے ہوئے حصوں میں انڈا بھی موجود ہوتا ہے جس کی زردی نرگس کے پھول کی آنکھ کے مشابہ ہوتی ہے۔کھانے میں انتہائی لذیذ اور دیکھنے میں دیدہ زیب ڈش ہے جسے شیر مال ‘تافتان یا روے میدے کے پراٹھوں کے ساتھ کھایا جائے تو اپنی لذت کو مزید بڑھا دیتی ہے۔ بر صغیر کے مسلم گھرانوں میں خاص خاص مواقع پر یہ ڈش تیار کی جاتی ہے ، نفیس اور اعلٰی "دعوتی پکوان" تسلیم کیا جاتا ہے۔
